Duket se surprizat për këtë verë në industrinë muzikore nuk kanë të mbaruar dhe vera do të jetë e mbushur me hite. Së fundmi Ylli Limani, i cili është ende duke shijuar suksesin e “Kaje”, bashkëpunimit më të fundit me Dafina Zeqirin, duket se ka në plan të publikojë shumë shpejt një tjetër projekt, këtë herë me një nga miqtë e tij.
Po flasim për Noizyn, me të cilin Ylli tashmë numëron dy bashkëpunime, hitin absolut të verës së shkuar “Alkool” dhe “Ylla”, e cila ishte pjesë e albumit të reperit dhe nuk ka (ende) një videoklip, por sërish është pëlqyer shumë nga publiku.
Megjithatë duket se djemtë kanë gati një tjetër surprizë për fansat e tyre dhe jo vetëm, dhe bëhet fjalë për një këngë e cila do të titullohet “Hapat”. Këtë e ka zbuluar vetë Ylli nëpërmjet një InstaStory, duke treguar se regjistrimi i këngës ka mbaruar, madje është gati edhe projekti për videoklipin, që është bërë nga një prej kompanive me të cilat ata bashkëpunojnë shpesh.
Nuk e dimë nëse do të jetë sërish një këngë me ritme verore, me temë dashurie sic kanë qenë deri më tani, apo ndoshta këtë herë do të eksplorojnë një tjetër lloj muzike, megjithatë ajo që dimë të themi është se Ylli & Noizy, nga një dyshe që nuk na e kishte marrë mendja se do mund t’i shihnim bashkë, tashmë janë kthyer në një “cift” suksesi artistik dhe në miq shumë të mirë, gjë që e ka zbuluar reperi në një prej intervistave të tij të fundit.
Tani mbetet veçse të presim të dëgjojmë “Hapat” e Yllit dhe Noizyt!!
