Vetëm një muaj ka mbetur nga nisja e formatit të njohur botëror “Love Island Albania”. Ky format do të sillet në Shqipëri, nën drejtimin e Luana Vjollcës dhe bëhet fjalë për një grup të rinjsh të mbledhur në një vilë në kërkim të dashurisë, famës dhe parave.
Teksa tashmë konkurrentët janë përzgjedhur, ka dalë edhe spoti i promos së emisionit. Por, diçka në promo ka tërhequr vëmendjen – dy personazhe të njohur nga formate të ngjashëm.
Bëhet fjalë për Atdhe Xheravinën, i cili është bërë i njohur në formatin “Për’puthen” dhe rrugëtimin e tij në “Big Brother Vip Kosova”.
Por, me sa duket nuk do të jetë personazhi i vetëm i njohur që do t’i bashkohet formatit. Edhe Eni Tare duket se do të jetë pjesë e “Love Island”, pas pjesëmarrjes në “Love Story” dhe “Big Brother Vip Albania”.
Tashmë mbetet të zbulojmë edhe personazhet e tjerë të këtij formati, i cili ka ngritur pritshmëri të larta në publik, prej suksesit absolut që ka pasur në çdo shtet ku është shfaqur, duke u cilësuar si emisioni më i ndjekur në rang botëror.
