Një grua shqiptare është vrarë në mes të rrugës teksa po kthehej nga puna në provincën Casterlfiorentino të Firences në Itali. Ngjarja e rëndë është shënuar rreth orës 20:00 të enjten e 28 shtatorit 2023. Mediat italiane kanë identifikuar viktimën si Klodiana Vefa, 35 vjeçe me leje të rregullt qëndrimi. Vrasja ndodhi në rrugën ‘Galvani’.
Kanë qenë disa rezidentë të zonës që njoftuan për vrasjen pasi dëgjuan të shtëna me armë. Mjekët e ndihmës së shpejtë nuk mund të bënin asgjë por vetëm për të konfirmuar vdekjen e 35 -vjeçares shqiptare.
Sipas të dhënave të para Klodiana Vefa është pritur në rrugë nga një person (burrë). Nuk dihet nëse ka pasur debat mes autorit dhe viktimës përpara se të ndodhte krimi, por ajo që dihet është se burri ka nxjerrë pistoletën dhe e ka vrarë 35 vjeçaren me plumb në kokë.
Kemi të bëjmë me një ekzekutim të vërtetë, kjo sipas të dhënave të para hetimore. Policia është në kërkim të bashkëshortit të gruas, që rezulton të jetë zhdukur dhe nuk bashkëjetonte me viktimën. Policia ka nisur të marrë dëshmitë e para, ndër ta dhe të dy fëmijëve të viktimës. Njëri prej tyre ka treguar se mes të ëmës së tij dhe të atit në të kaluarën ka pasur dhe konflikte, shkruan corriere.it , (media italiane)
Policia ka ngritur pika kontrolli për arrestimin e autorit, ndërsa po kontrollohen dhe banesat e braktisura, por ende nuk është rënë në gjurmët e autorit .
“Është momenti I qetësisë. Duhet ti qëndrojmë pranë një familjeje që po përjeton një ngjarje të tmerrshme” – tha Kryetari i komunës Castelfiorentino Alessio Falorni.
